Serikali ya Jamhuri ya Muungano wa Tanzania, imetoa kiasi cha Shilingi bilioni 8 kugharamia ujenzi wa Kituo cha Kupokea na Kusambaza Umeme cha Imalilo mkoani Simiyu kwa asilimia 100.
Hayo yamebainishwa na Mkurugenzi Mtendaji wa TANESCO, Bw. Lazaro Twange, wakati wa ziara ya ukaguzi wa mradi huo ambapo alisisitiza kuwa ujenzi huo unaofanywa na wataalamu wa ndani umefikia asilimia 20.75 tangu ulipoanza mwezi Oktoba 2025.
Lengo kuu la mradi huo ni kutatua changamoto ya muda mrefu ya kupungua kwa ubora wa nishati mkoani humo, hususan wilaya ya Bariadi, ambayo kwa sasa inategemea umeme unaosafiri umbali mrefu kutoka mikoa ya Shinyanga, Mwanza, na Mara.
Pamoja na kituo hicho, ujenzi wa njia ya kusafirisha umeme wa msongo wa kilovoti 220 (220kV) kutoka Shinyanga hadi Simiyu utasaidia kuimarisha miundombinu na kuhakikisha huduma ya uhakika inapatikana kwa wananchi.
Mradi huo unatarajiwa kukamilika rasmi ifikapo Mei 2026, na kuanza kutoa huduma kamili kuanzia mwezi Juni mwaka huu.
Kukamilika kwa Kituo cha Imalilo kutaondoa utegemezi wa umeme kutoka mikoa jirani, jambo ambalo litaongeza tija katika shughuli za kiuchumi na kijamii mkoani Simiyu kupitia nishati yenye nguvu na isiyo na mabadiliko ya mara kwa mara.
About the Author
