Wizara ya Fedha imeliomba Bunge kuidhinisha jumla ya shilingi trilioni 21.3 kwa ajili ya Mwaka wa Fedha 2026/27, ambapo shilingi trilioni 19.4 zitatumika kwa matumizi ya kawaida na shilingi trilioni 1.8 kwa miradi ya maendeleo.
Waziri wa Fedha, Balozi Khamis Mussa Omar, alieleza kuwa bajeti hiyo inalenga kukuza uchumi kwa asilimia 6.3 mwaka 2026 na kudhibiti mfumuko wa bei ubaki kati ya asilimia 3 hadi 5.
Katika mikakati ya mapato na matumizi, wizara inakadiria kukusanya jumla ya shilingi trilioni 55.2, huku Mamlaka ya Mapato Tanzania (TRA) ikitarajiwa kukusanya shilingi trilioni 39.
Ili kupunguza malimbikizo ya madeni serikalini, Serikali imepanga kutenga shilingi bilioni 100 kila mwezi kwa ajili ya kulipa watumishi, wakandarasi, wazabuni na watoa huduma wengine.
Kuhusu utekelezaji wa bajeti iliyopita ya 2025/26, hadi Aprili 2026 wizara ilikuwa imepokea shilingi trilioni 14.08 (asilimia 70.63 ya bajeti iliyohuishwa) na kutumia shilingi trilioni 14.05.
Ndani ya kipindi hicho, Serikali ilikusanya shilingi trilioni 41.37 kutoka vyanzo vya ndani na nje, huku ikitumia shilingi trillions 9.74 kuhudumia deni la taifa kwa wakati na kuijengea nchi uaminifu wa kimataifa.
Uchumi wa nchi umeendelea kuimarika na kukua kwa asilimia 5.9 mwaka 2025 ikilinganishwa na asilimia 5.5 ya mwaka 2024, ukichangiwa na sekta za kilimo, madini, na ujenzi wa miradi ya kimkakati.
Aidha, mfumuko wa bei ulidhibitiwa kwa wastani wa asilimia 3.4, huku akiba ya fedha za kigeni ikifikia dola bilioni 5.72, kiasi kinachotosheleza uagizaji wa bidhaa kwa miezi 4.4.
About the Author
